सदरलाइनडटकम 
२३ जेठ, खजुरा (बाँके) : बाँकेको खजुरा डि गाउमा जारी टुबोर्ग तेस्रो नेपालगन्ज गोल्डकप फुटबल प्रतियोगितामा लाली रूपन्देही–११ ले घरेलु टिम नेपालगन्ज–११ लाई पाखा लगाउदै फाइनलमा पुगेको छ ।
खजुरा गाउँपालिकाको डीगाउँस्थित नेपाल राष्ट्रिय आदर्श निमाविको मैदानमा बुधबार सम्पन्न पहिलो सेमिफाइनल खेलमा आयोजक नेपालगन्ज–११ लाई ४–२ गोल अन्तरले पराजित गर्दै गत वर्षको डिफेन्डिङ च्याम्पियन लाली रूपन्देही–११ फाइनलमा पुगेको हो ।
प्रतियोगितामा लाली रूपन्देही–११ बाट जनक कार्की, ग्लोरी जोन, सालेहो र फोनाले एक–एक गोल गरेका थिए । खेलको पहिलो हाफसम्म रुपन्देही ३–० को अन्तरमा थियो ।
दोस्रो हाफको एक मिनेटमै अर्थात खेलको ४१ मिनेटमा नेपालगन्ज–११ कर्ण लिम्बुले पहिलो गोल फर्काएका थिए । ६५ मिनेटमा विभुषण केसीले दोस्रो गोल गरेका थिए ।
बिहीबार दोस्रो सेमिफाइनल सुदूरपश्चिम–११ र समूह ‘बी’ बाट बाइ पाएरसिएमजी संकटा क्लबबीच खेल हुनेछ । लाली रूपन्देही–११ र दोस्रो सेमिफाइनलका विजेता टिमबीच फाइनल खेल भने २६ जेठमा हुनेछ ।
तेस्रो नेपालगन्ज गोल्डकप फुटबल प्रतियोगितामा लाली रूपन्देही फाइनलमा
२३ जेष्ठ २०७५, बुधबार २०:०६
